? 首回 ?
時間晏矣，路裡的鼓仔燈攏已經收收起來，賰月娘佇烏暗的天頂，照甲規路光光，雖然惜惜已經共貓目還轉去，也毋免閣攑提燈。
路裡無啥人，惜惜行一段路出去，看袂著林家的時，就隨共手內扷糊糊的蔥仔擲佇咧塗跤。
來到園仔邊，暗風微微吹過蕉葉，引起惜惜第一回飛起來的記憶，彼暝的對天頂看落來的田園嘛是遐呢青，予伊的暗暝有血紅以外的色緻。
若二少爺去日本，惜惜嘛嫁翁了後，敢閣會當看著山坪至海岸的風景？
惜惜猶閣咧烏白想，雄雄予後壁的聲驚一下。
「阿惜，你咧看啥？」
惜惜緊越頭，看著知來提一支彎彎的鐵管過來，知來見惜惜咧看，笑一下了後講：「這毋是一般的銃喔，你看。」
原來這就是銃，惜惜看知來正手撨一下，短銃踮伊手頭「吭吭」兩聲，然後伊共銃攑起來對路邊「碰」一下，但是塗跤無加一個窟仔，顛倒是浮一粒若飯丸的土角。
「這是欲予阮試看覓爾，看起來無蓋厲害。」知來看惜惜無啥反應，紲講，「聽講真正的魔御欲飛天遁地攏會當，無輸散毛仔乎？」
惜惜猶閣咧看彼土角，干焦應：「是呢。」
知來繼續講：「這是西洋人的術法，唐山遐的阿伯講，這馬中國內戰，逐家相爭揣洋人鬥相共，怹嘛想欲栽培家己的人，這就是按怎我佮鑑青欲去日本。」
惜惜聽著這句才攑頭看知來：「二少爺佮三少爺，以後欲去唐山？」
知來的笑容蔫去：「阿爹佮阿伯目前是按呢安排，毋過我家己有其他想欲去日本看覓的原因。」
惜惜想著知來講欲讀法律，彼是臺灣無當讀的。
「我咧想，是按怎人攏愛互相看袂起？」雖然惜惜無應，知來做伊講，「百偌冬前的法國人就講，人生落來就應該自由，有仝款的權利，逐家愛互相照顧，但是到這馬，日本人、福佬人、客人、番人……莫講互相照顧，仝款的權利嘛無，這種烏白來的法律是按怎定的？欲按怎改？我真正想欲知影。」
「少爺……」惜惜的聲焦焦，閣淡薄仔掣，「你無咧受氣乎？」
「唅？」知來規個戇面，「我會當去日本，足歡喜啊？」
惜惜搖頭，微微仔笑：「無代誌。」
「著啦，阿惜。」知來若像閣雄雄想著啥，「聽講『魔』就是世間萬物天生之氣，『御』就是共這氣化做家己用，你會當變貓變豬，閣會飛天、治療，敢是嘛用著『魔』？而且散毛仔——煞魔仔，敢有可能就是彼字『魔』？」
若講著字，惜惜嘛聽無，干焦幌頭。
「若是按呢，你毋就算講是我的師姊？」知來笑甲誠心適。
「無仝啦。」惜惜細聲應。
彼暝了後，知來繼續無閒，惜惜嘛無閣逐禮拜等伊轉來。
正月過了無偌久，阿敏嫂趁出門買物件的時，共惜惜搝到車頭，偷偷仔講：「你敢有看著彼號阿賢？」
惜惜綴伊的目睭看過，干焦看就一群拖力阿卡的查埔人褪剝裼咧開講，嘛毋知影佗一個是阿賢。
「有看咧無？較大箍的彼個。伊人誠骨力閣古意，怹某轉去欲兩冬矣，猶未閣娶，若綴伊一定袂枵著。」
惜惜看起來逐家攏平平大箍，干焦搖頭。
「你無佮意？」阿敏嫂隨大聲，「阮是有幫你揀過呢，無你敢欲愛跛跤仔阿明？抑是茂仔？茂仔傷愛跋筊，我是苦勸你毋通。」
「無啦，我猶閣無咧想嫁翁的代誌。」
阿敏嫂一箍面漚滯滯：「你是咧假細膩？這馬老爺好心欲幫你做主，若有嫁粧，番仔婆嘛有人愛，就莫等甲無人欲持才喝欲嫁。」
惜惜毋講話，阿敏嫂共伊一路唸到厝。
彼工了後，阿敏嫂時不時佮惜惜提起佗一個查埔人猶未娶，惜惜無一擺共應。
惜惜毋知影知來少爺留學的代誌敢辦好矣？毋過夫人欲予伊紮過的新衫佮生活需要的物件已經幾偌箱攢好。
出發的日子若來若近，雖然學校已經停矣，知來佮鑑青嘛是逐工出外，有同學相招，嘛有予四界親情請。
蹛厝裡的最後一暝，一家伙仔做伙食飯飽，兩兄弟共老夫人叩頭了，就予兩位夫人早早趕去歇睏。
惜惜共飯廳抨掃清氣，來到灶跤已經無人佇遐，伊踮烏暗中行過二門，西護龍第一間猶閣光咧，四界無人，惜惜直接推門。
「啥……欸？」桌仔前的知來越頭看著惜惜，完全無想著的款。
惜惜共門關予密，然後行來知來面頭前，噗一下就跪落去。
「你這是咧創啥？」知來緊徛起來，伸手欲共惜惜捍起來，但是惜惜硬覆落去。
「二少爺，若是阿惜欲綴你，少爺敢欲持？」
知來定定共看，惜惜頭殼叩塗跤，長長的頭鬃尾垂落頷頸邊，身軀穿的是正月的新衫，一色青綠，按呢看才發覺，伊若竹篙的身形，嘛是有女性的妖嬌。
「阿惜，你這是嘛欲去日本的意思？」
「去日本嘛會當。」惜惜攑頭，烏金的目睭直直共知來看，「就算講少爺毋免靠山，阮嘛會當服侍少爺……這馬就會當。」
「欸……」知來越頭四界看，房間內當然是無捌人，「等咧，你講的服侍……阿娘毋是講欲幫你揣翁婿？你敢無愛？」
惜惜隨搖頭。
「你若無愛嫁，嘛會當嫁粧予你，看你欲去學洋裁抑是啥，這馬的女性嘛是會當家己生活。」知來講了停一下，然後向塗跤細聲講，「我是袂共查某留佇身軀邊，耽誤人一世人。」
惜惜無應，干焦直直看知來。
「好啦，你緊去睏，我明仔載會共阿娘講你無愛嫁翁，予你自由。」
知來講了，閣等一段時間，惜惜才向頭。
「多謝二少爺。」惜惜講了，隨徛起來，欲離開知來的房間。
「阿惜。」伊開門進前雄雄閣聽知來咧叫，「阮漢人看袂起番人，這一時無法度改變，我本來想講若有翁婿佇你的身邊，拄著啥物代誌會當佮你互相照顧，莫予人欺負，你若無愛，去其他的城市、食其他的頭路生活，逐家看著的就是彼個頂真閣骨力的曾惜惜，毋是啥物人的查某囡。」
惜惜徛佇門前，也無越頭，干焦細聲應：「多謝。」
「若有一工，咱逐家攏會當……」知來講一半，雄雄停落來，「毋是，應該按呢講，我就是欲予逐家仝款自由的彼日出現。」
惜惜共知來影一下，啥物嘛無應就離開。
熱人時的下晡六點，日頭猶閣光光，但是無遐燒熱，幾個仔查某人對薰草工場行出來，有的才二十通歲，有的看起來欲倚四十，逐家歡喜開講。
上尾後的惜惜無講話，毋過嘛喙脣含笑，今仔是領薪水的日子。
兩三個平歲的姑娘欲趁暗時進前去街路踅踅，惜惜家己一個先去米店，看著邊仔咧賣魚乾，伊徛佇店頭前規半晡，了後買一尾上細條的魚乾。
日頭猶未落山，惜惜行來到大稻埕碼頭邊，霞光共淡水河照甲朱紅，暗風共青絲吹落伊的頭鬃尾，惜惜踮駁岸邊坐落，看水波金閃爍爍，雖然看袂著大海，記憶中的波浪嘛是踮心肝頭起起落落。
「咪——」
惜惜緊共貯魚乾的袋仔攑懸，一隻柑仔色的大貓硬鑽過來，惜惜徛起來，伸跤共踢。
「閃啦！」
貓仔哀一聲，隨旋無去，惜惜既然徛起來矣，嘛共米袋捾起來，越頭轉去。
米袋誠重，惜惜慢慢仔行，一隻船拄仔好入港，規大陣工人過來搬貨，雖然惜惜儘量閃較遠，嘛是有兩三個工人共伊影過來，惜惜偷偷仔影共轉去，但是連面也看袂清，就閣緊越頭。
踅入去巷仔內，惜惜一步一步，一面想盈暗欲食啥，一面轉去。
故事暫時到遮，兩人個未來猶閣誠長，毋過就是另外一個故事矣。
達人
