這是《芭蕉翼》的下篇，上篇是〈煙花未開〉，每週五短期連載的純臺文小說，隔週三會有 中文翻譯版。
大正七年，青實已落。
烏帽頂的金星行過街市，路邊販仔攏毋敢攑頭，干焦看著腰邊長劍幌來幌去。
「大人來矣。」路裡的人細聲仔講。
路頭行過來的少年，身軀是日本高校的制服，喙內講的顛倒是臺灣話：「誠衰，盍會閣拄著四跤仔？」
伊毋但無偷偷仔講，閣兼反白目，予巡查看著，聽無蓋有嘛知影是咧共罵，隨共喝一聲停，但是少年無欲共插，做伊繼續行，然後領仔就予搝過。
邊仔的人早就閃無去，少年人無蓋粗勇，閣偝一個包袱仔，予搝甲徛袂在。
巡查用日語罵，少年頭越過當做聽無，巡查愈來愈氣，欲共搝去派出所的時，雄雄哀一聲。
「痛み！（足痛）」
原來一隻鳥鼠仔色的大貓咧咬伊的跤腿，巡查幌跤也幌袂去，煞提佩劍來摃貓，猶袂摃著就予貓走去，巡查喙內罵一聲，攑頭發現拄才彼個少年人嘛走無去矣。
少年走對城外，無偌久彼隻大貓嘛走過伊的跤邊，鑽入去路邊的番麥園，少年跤步放慢，看四界無人，伸手共番麥叢掰予開，嘛鑽入去。
這站的番麥生甲比人懸，目睭所看著的干焦青綠色，雄雄看著一個烏影徛佇咧青綠之中，正是一個十七通歲的躼跤姑娘。
「阿惜。」
聽著家己的名，惜惜隨越頭過來，幼聲仔應：「二少爺。」
知來大步行來惜惜身軀邊，伊去讀高校這幾冬，無啥大漢，顛倒惜惜生甲愈來愈懸，逐擺轉來攏無啥相仝款，這馬看起來兩人差無兩吋。
雖然人大漢，惜惜頭頂嘛是若囡仔的鉸剪眉佮頭鬃尾，這幾冬來攏無變。
知來攑頭看著天清無雲，煞講：「天氣遮呢好，應該來廟埕踅踅咧。」
「夫人從透早就咧等你轉來呢。」
「哼，就毋是去留學，逐禮拜攏咧轉來。」知來共肩胛頭偝的包袱仔塞予惜惜，「無你幫我提物件，綴我行。」
也毋管惜惜敢有提予好，知來就做伊行，惜惜緊共包袱仔咧，綴佇知來後壁，聽著跤步聲，知來微微仔展笑。
「欸，你會變貓，敢會變別項？」
惜惜喙翹起來，久久無講話。
「按怎？散毛仔的代誌，袂當講？」
「毋是啦。」惜惜緊搖頭，「少爺攏知矣，無啥袂講得，毋過……足歹看。」
「就是歹看才會驚人啊。」
「嗚。」惜惜規個面紅記記，過一下仔才細聲講，「猶閣會當變做豬啦。」
「哈，豬來狗走，嘛是袂?。」知來笑笑咧，閣問，「欲做番婆鬼，敢是愛拜佗一個神明？親像童乩拜三太子就有神力。」
惜惜從來毋捌共人講過遮代誌，毋知影知來是按怎雄雄問起，但伊嘛乖乖仔應：「無呢，無聽阮阿娘講過，我嘛是綴夫人拜媽祖、拜七娘媽。」
「按呢喔。」知來家己踅踅唸，「敢講毋是巫，是魔？」
惜惜聽無伊咧講啥，少爺是讀冊人，佮伊這毋捌字的查某無仝，會當行佇知來後壁，惜惜就足歡喜矣。
「這欲學嘛無簡單吧？」
「這……」惜惜想著彼暝阿娘叫伊咒誓的話，「若有決心，就無蓋難吧。」
兩人來到街仔市，知來無閣問番婆鬼的代誌，買寡糖仔佮惜惜相合食，惜惜留一半欲提轉去予知新，然後兩人到廟埕聽唸歌，今仔唸的是新歌，講的是義賊廖添丁入去總督府共官印偷走，知來聽甲歡喜，閣買一本歌仔冊。
轉來到厝裡已經過晝，知來予林夫人唸規半晡，惜惜嘛頭殼犁犁徛邊仔，佳哉欲唸到惜惜的時，知來隨應喙講是伊硬搝惜惜來行，才無予夫人罵。
知來予罵了，惜惜共灶跤賰的飯佮菜燙燙咧予伊食，飯菜碗箸祀佇咧知來面前，惜惜就欲來去，但是予知來喝一聲。
「阿惜，你盍毋食飯？」
「少爺先食。」
「來。」知來共邊仔的椅仔拖出來，「這馬嘛無別人，你去添一碗飯做伙來食，遮呢晏矣是欲枵甲當時？」
惜惜無講話，也無振動。
「緊咧啦，當做是陪我食，好無？」
知來按呢講，惜惜才去添一碗飯過來，踮伊的邊仔坐落，毋過猶閣不時看外口敢有人行過。
知來無咧共插，做伊食飯，一面食一面講話：「進前攏毋捌共你問過，恁四番莊的人，敢是攏散毛仔？」
惜惜心內驚一下，四番莊是牛眠山、守城分、大湳、蜈蚣崙這四個莊頭，因為攏徛番人，才號做四番莊，雖然林家踮守城分咧剉樹仔，做少爺的知來從來毋捌去過。
但是惜惜家己蹛佇守城分的時嘛猶閣細漢，來到林家了後，逐家攏驚番婆鬼驚甲欲死，更無人共問過這款代誌，毋是踮伊後壁偷偷仔講，就是欲共伊笑，所以伊家己嘛無啥愛講。
「細漢的時陣嘛無綴阿娘轉去後頭厝，少爺問這我嘛毋知。」
知來攑頭看惜惜：「初二嘛無轉去？」
「阮番仔婆無咧過年啦。」惜惜隨共應。
知來無聽過惜惜按呢大聲講話，頷頸勼一下。
「是啦，恁阿娘嘛有怹的年節。」
惜惜看伊無啥振動的碗內，無看著知來的反應。
「少爺，阮阿娘過往遐久矣，莫閣講伊，好無？」
「過往閣較久嘛是阿娘啊。」
知來講落去，惜惜的目屎就欲流出來。
「雖然我是番仔婆，從細漢攏穿福佬衫、講福佬話，少爺你問這我真正毋知。」
「阿惜。」知來踮惜惜面前的桌仔輕輕仔觸兩下，「你毋是番……」
伊看惜惜攑頭，禁袂牢的目屎流落來，煞講袂落去。
惜惜緊共目屎
咧，毋過目睭猶閣紅紅。
咧，毋過目睭猶閣紅紅。 「人攏看番仔袂起，我嘛是知知，少爺無共我嫌，我就足歡喜矣。」
知來干焦直直共惜惜看，惜惜面越過，共碗箸提起來，行入去灶跤。
「阿惜。」也毋知影敢有聽著，知來嘛是大聲講出來，「你比我較厲害，我哪有可能看番仔袂起？」
惜惜跍佇咧灶邊仔，鼻仔抽兩下，目屎閣流落碗內，伊無哭出聲，過兩下仔，開始扒飯，扒兩喙，目屎閣繼續流。
這馬林家除了阿敏嫂，其他的查某年歲攏比惜惜細漢，逐家驚伊驚甲欲死，就算講看著嘛毋敢共罵，若是有人去佮夫人投，知來嘛會幫伊講話……至少進前攏會。
但是惜惜無想欲予人看著，緊共飯食了，假無意咧摒掃灶跤，過一段時間才出去，桌仔頂干焦賰空碗盤，無看咧少爺。
達人
