? 首回 ?
吭——
飯碗踮跤邊摔破，猶袂知驚就予一個白色的腰閘佇咧面頭前。
「你這馬是咧創啥？」
「拍某啊。」
「阮是你的人，予你拍是應該，但是袂當予你傷著囡仔。」
「我當時傷著惜惜？」
碰——
面前的大人應聲摔落，一時拳頭若西北雨，落甲伊目睭內做大水。
「你這個番仔婆就誠疼囝呢？一工到暗毋知影咧變啥物蠓，厝裡也無咧顧，番仔就是荏懶，算我目睭膏著蜊仔肉才娶你，你閣當做惜惜是你的！共你講，惜惜是綴我的姓，我愛欲……」
「閃開！」
查埔人的大手伸過來進前，就予撥開。
「你……」
菜刀捎起來，銀光逼來面頭前，白衫隨化做一葩青火……
惜惜褫金目睭，猶閣一片烏暗，今瞑也無看著阿娘的面，邊仔阿華姊仔睏甲鼾鼾叫。
惜惜偷偷仔爬起來洗面，攑頭天星佮守城分看著的仝款閃閃爍爍，惜惜面洗了，踮灶跤門跤口坐到天光。
天光開始閣是一工無閒，今仔日早頓收了，惜惜就出門去布店幫夫人提進前注文的西洋布。
頭家娘看著惜惜，一句話也無講，對櫃臺下跤提一個包袱仔出來，擲予惜惜，惜惜細聲多謝，隨離開布店。
時間猶閣早，行到公學校邊仔，惜惜停落來，四界看一下，斡到後壁一欉榕仔邊，爬去入樹頂看學校內。
一個查埔囡仔坐佇咧運動埕邊仔，顛倒是大漢的兩個提竹仔咧相戰。
原來林家武官代出，雖然做官的族親踮割臺以後攏搬去唐山，留踮臺灣的查埔囝嘛是從細漢學武。
鑑青上聽話，徛馬勢的時陣無聽著師父一聲「好」毋敢起來，學拳學刀攏照起工咧操練；知來上無定著，逐擺凊采舞兩個就走去迌。
平常時的訓練戰一下就分明，竹仔舞佇咧鑑青手頭頂若劈刀斬風，敏如獐豹落樹，勢似烏熊出林，知來憑伊身懸加小可、竹仔長小可，但戰但退，無予鑑青倚身，毋過運動埕就按呢爾爾，閣賰兩三步就欲到牆仔邊。
惜惜看怹倚近，覕佇咧葉仔後，毋敢振動，啥知知來雄雄對頭殼頂挑一劍，樹尾搖一下這邊包袱仔落落地，彼邊樹子落大雨。
「著！」
趁鑑青閃樹子，知來的竹仔已經點著鑑青的嚨喉前。
「呼——」樹頂的惜惜吐出大氣，毋過伊猶袂赴歡喜，就發現拄才落落的包袱仔煞來予人抾著，偏偏閣毋是捌人，就是昨日予知來喝聲就走的查埔囡仔中的一個。
惜惜隨跳落去，查埔囡仔驚一下放手，予惜惜共包袱仔搶轉去。
「好大膽！」彼個查埔囡仔嚷出來了後，才看著是惜惜，「原來是番仔婆，盍毋轉去你的樹仔頂？」
惜惜欲走，但是領仔予搝牢咧。
「昨昏的代誌猶未佮你算數，這馬林二少爺無佇咧，看你欲按怎？」
話猶未講了，拳頭母就過來，惜惜共包袱仔抱予牢牢，跍佇咧土跤，隨在伊按怎拍，伊用舂的無夠，閣兼踢，踢著惜惜的喙?，血水甜味淹來到喙脣邊。
等伊舂甲滿意，歡喜離開，惜惜才爬起來，雖然包袱仔有淡薄仔腌臢，內底的布攏無代誌。
惜惜共面
一下，緊來轉去，伊行來到公學校大門前，就看著兩個少年佮一個囡仔做夥行出來，惜惜猶未決定欲閃無，較懸彼個就越頭過來。
一下，緊來轉去，伊行來到公學校大門前，就看著兩個少年佮一個囡仔做夥行出來，惜惜猶未決定欲閃無，較懸彼個就越頭過來。 「阿惜？」
聽著知來咧叫，惜惜只好乖乖仔行過。
「遐呢拄好？」鑑青嘛影過來。
惜惜頭殼犁犁，但是感覺著知來猶閣咧共看。
「你的面是按怎會烏青？」
「跋倒。」惜惜隨應。
知來閣看兩下仔，然後越頭。
「看你物件攏提著矣，應該是欲轉去？做夥行吧。」
知來佮鑑青行佇咧頭前，惜惜行來知新邊仔，伸手共伊牽起來，四個人做夥轉去林家。
知新平常就無啥講話，路裡攏是知來佮鑑青的聲，知來講七句，鑑青才應有三句。
「公學校內底的比賽爾，遐認真是欲創啥？就算講得著冠軍，州內比賽嘛攏是會予日本人贏，咱舊年毋就是按呢？」
「毋過阿叔講，啥物代誌欲做就袂當凊采。」
「嘛是愛有機會的代誌才有算，裁判攏是日本人，是欲按怎比？當初怹戰贏大清，就一直看咱袂起，我就想無阿爹是按怎欲去看這款的運動會？」
「人佮邀請就罔看吧？聽講會放煙火呢。」
「上好是放袂出來啦！」講到遮，知來雄雄停落來。
惜惜看袂著伊的面，但是感覺伊有啥物拍算。
「鑑青，你敢知影公學校的倉庫有一面窗仔破去？」
「按怎？是你摃破的？」鑑青隨緊張起來。
「毋是啦！我是咧想講，煙火毋就是囥佇咧倉庫內底？」
「莫啦！阿爹會共我摃死，阿叔嘛是。」
「哪會有人知？」知來停一下，「敢講你會講出去？」
「我……啊喲，知新佮阿惜嘛咧聽呢。」
知來越頭，惜惜看著伊的笑容，隨共面藏佇咧鉸剪眉下跤。
「阿惜，你敢會講出去？」
「這……少爺你拄才有講啥？」
「齁！阿惜攏嘛聽你的話。」
知來干焦嘿嘿直笑，然後繼續挐鑑青，兩個人冤到林家大門口，忽然間做夥恬落來。
鑑青行東爿，知來佮知新行西爿，知新到灶跤就走入去，知來繼續行到伊的房間，惜惜綴佇咧後壁，看伊欲入去時，細聲佮叫。
「少爺。」
「按怎？」知來越頭。
「彼號……」惜惜毋敢看知來的目睭，「拄才講日本人看咱袂起，然後人攏看番仔……」
「啥物人閣叫你番仔？」
知來雄雄歹一句，惜惜驚甲攑頭，看伊面色足恐怖，緊應講：「無，無代誌。」
知來看惜惜烏青的喙?，吐一聲大氣。
「你是林家的人，袂當放予人欺負，若拍袂過就愛講，知莫？」
惜惜頓頭，隨細聲講：「我來提布去予夫人。」
猶袂等知來應話，惜惜就斡入去後院。
寫到知來佮鑑青相拍，我想這個男主角有夠無路用，到時敢會逐家攏較合意鑑青XD 但是我上寫這款。
明仔載閣來講日本時代的運動會佮體育課，可能袂像尪仔冊這呢趣味，應該嘛無查遐呢久，毋過以後會固定拜六攏有一篇考古。
達人
